الديك المحبوس
· الديك المحبوس
* قبل أيام جلست وصديقي
"ثُعلبه" في فرندة منزلي في مدينة البيرة، بينما كان المطر يسقط بغزارة
مبشرا بموسم زراعي خير لهذه السنه...وحمدنا الله على ذلك، وكنت مبتهجا لمزروعاتي
الشتوية في حديقة المنزل.. وكنا نرى هذه المزروعات من البازيلا والفول والحمص
والسبانخ والقرنبيط والملفوف والخس والبصل الاخضر والبقدونس والبطاطا من وراء زجاج
هذه الفرنده نامية ومشكلة لوحة خضراء جميلة امام ناظرينا ... جلسنا نحتسي الشاي
بالزعتر الفارسي.- او ما يسمى زعتر العراق، او القرنيه او زعتر دق عدس.....الخ من
المسميات.- وبدانا نتذكر ايام زمان،-حيث مضت مدة طويلة لم ارى صاحبي فيها - كيف
كان الناس يعيشون حياتهم اليومية..ونتداول نكات على قرانا في فلسطين كيف كانوا
يتمسكون ببعض النوادر عن هذه القرى في الايام الغابره، ويعايرون بعضهم ..!! وفي
معظمها نقل احاديث.الناس !!....ويحلفون انها حدثت وصارت بس من زمان، صارت مثلا
..بل امثالا..فعندما مثلا يسالون عن بلد احدهم من الضيوف القادمين ..انت من وين
جنابك؟ يقول لهم ..انا من ...قرية ...كذا كذا..على طول يقولوا انت اهل بلدكم سووا.هيك
وهيك..(احدى النوادر )..فتذهب مضربا للامثال كثير من هذه الحكايات
·
فمثلا احدى هذه القرى كما
حدثني..صديقي "ثُعلبه"، كان اهلها في الزمان الغابر - هيك بيحكوا –
يجبروا الفقوسة في مقثاة الفقوس..لان نموها غير مستقيم – عوجا- كانوا يحاولون تصحيحها،
وفي قرية اخرى يحكى ان اهلها كووا شجرة التوت الاماكن المتدرنه على الساق..!!
واخرون ربطوا الجامع وحاولوا ينقلوه!! وقرية اخرى قالوا عن ان اهلها غسلوا السكر
بالماء نظرا لوجود قزاقيز – شوائب – اي يضربون فيهم المثل بالتياسه كيف تخطر في
بالهم ان يغسلوا السكر لانهم بعد ان عملوا عملتهم، لم يجدوا لا سكر ولا غيره!!
واحدى القرى "طخوا اهلها الشمس" بعد ان حشروها في البئر لانهم تضايقوا
منها، واصل الحكاية كما ذكر صديقي..ان الاهالي في الصباح كانوا يذهبون الى حقولهم
الزراعية الموجودة في شرق البلد فتاتي تضرب-الشمس في وجههم وفي المساء يذهبون
بعودنهم باتجاه الغرب للعودة، فتاتي – تضرب-الشمس في عيونهم، يوم وراء يوم ، لما
تضايقوا وقالوا بعدين في هالشمس مش مصليه على النبي!!، وين ما رحنا في وجهنا عمت
قلوبنا..فقال احدهم صاحب شور..!! في نباهة غير مسبوقة –هيك بيحكوا – انه عند حل
...فقام بفتح غطا بئر جمع امطار شتوية لهم، وقال لهم هايني حشرت الشمس بالبئر، حيث
دخلت اشعة الشمس بالفعل الى داخل البئر.. وقال لهم هاتوا هالبواريد –بنادق-
وطخوها، بعدين قالهم سكروا البئر وخلص عمرها ما بتطلع.ولا عمر عواد بيعيدها...!!
..وفي قرية اخرى ، حدث ان كان مختار القرية يلبس قمبازا وجاكيتا دائما في الصباح
ويقعد مع الحامولة تبعتو في هالديوان ..ففي واحد مستغرب كيف هالمختار ملابسه
وقمبازه وجاكيته دائما مكويات...فاحب ان يعرف من المختار عند اي دراي كلين حضرته
ببعث ملابسه!! طبعا هذا زمان من مئات السنين لا دراي كلين ولا غيره ، يمكن مكوى
على بابور الكاز- فساله للمختار يا ابو فلان بدي اسالك بلا زغرة وين بتكوي
دمايتك-قمباز لباس عربي- قلو بس اتحكيش لحده ..انا والله المراه بتغسلهن كل يوم
وبتحطهم في الطابون لما ينشفن وبيطلعن مكويات ..اكيد يا ابو فلان قالوا بقلك اتحكيش
لحده...راخ دوغري على مراته قالها يا حرمه ..هيك هيك بيصير وليش هي اشطر منك مرة
المختار اكوينا اياهن هالشربوحتين..قالت له ان شاء الله بس ازبل الطابون روح ارجع
انت.عند اصحابك..ثاني يوم الصبح بدو يلبس
ويطلع على الديوان..قالها هاتيلي هالاواعي ان شاء الله كويتهم ...قالتلو . انت مش
داري شو صار.؟؟.قال لها لا ..قالتو سويت زي ما وصفلك المختار..وحاطيت الدماية
والحطة جوا الطابون .وغلقت عليهم باب الطابون ..ارجعت بعد ساعة زي ما بسوي لما احط
صينية بطاطا ..في الطابون..فتحت باب الطابون ..وحاولت اسحبهم من جوا ولما طلعتهم
برى مشان الهوى ينشف الباقي اذا مش ناشفات..لكن والله ما في دقيقة الا هن انزلن
الملابس على الارض بس ارماد مبحبثات –قطع صغيره-..قلها الله لا يهديلك اياه البال
..هذا قمريتهن كثير – حمرتيهن-..قالتلو لع يا زلمتي ..بس بيجوز اخذ عليهن السوا-اي
استوين اكثر من اللازم.-.المهم لا ظل لا حطة ولا دماية ..راح جاب هالعقال ..وبلش
يضرب في امراته..ويسب عليها انت ما تنغعيش انت ما تنقنيش..! يالله ضبضبي اواعيك
وعند دار اهلك ..وحردت المره..وقعدت اشهر لما رجعها !!---انا قلت لصديقي يا رجل
انت من عقلك هاذ الحكي..ول هم تيوس لهالدرجة.قالي هاذا الحكي قبل مئات السنين
..بقوا الناس غشم...!
·
وقال
لي بس خليني احدثك اخر اشي عن بلد قريبة عند بلدكم...قلت هات وحده وبس، قال لي
صديقي انه كاين في واحد كبير في السن من قرية ...كذا..ومربي طيور ...– دجاج وحمام
وارانب ، وكان لا يؤمن بالعملات ..النقدية ومعروف انه كحته.!!..فكان مثلا يشتري
شوية كاز مشان البابور – بريموس – كان يعطي صاحب الدكان بيضة او بيضتين من بيضات
الجاجات اللي مربيهم...وكان الدكانجي يقبل منه الوحيد مثل هذه المقايضة ..اما باقي
الناس فكانت تدفع قروش وتعارف –نقد فكه- فسالته اشمعنى هذا الختيار بقبل منه
مقايضة..فقال لي هذا الختيار جاجاته عندهم ديك ، والبيضات اللي من عند هاذا الحاج
كانوا ملقحات من الديك..وصاحب الدكانه كان يربح فيهم لانه ببيعهم للناس للترقيد
وتفريخ الصيصان ..وكان الختيار هذا عنده الديك زي واحد من ولاده..حتى في احد
المرات شعر انه البيضات قلت اعداده..فراقب الجاجات والديك وثبت انه بودرن – اي
تزور الجاجات جاراتهن .!!!.اي تبيض الجاجات عند الجيران اللي عندهم ايضا جاجات لكن
ما فيش عندهم ديك.!!.فكانوا يفرحوا لما يجين جاجات الختيار مع ديكهن..وصاروا
يبيعوا عند الدكاكين بسعر اعلى من غبرهم لانه ديك الختيار كان لما يجي مع الجاجات
لعند جاجات الجيران...يلقح بيضات جاجاتهم..فعرف الحاج السبب!!!..وزعل من الجيران
وقالهم انا بدي اشكى عليكم..المهم في النهاية عمل الحاج طريقة مشان ينهي هذا
الاستنزاف فصار يربط الديك في حوش البيت عنده...وصارت تنكت الناس ....انتو من
البلد اللي ازلامكم بيربطوا الديوك وبتكبسو...الجاج بالايجار...فيبدو ان الناس حسب
النادرة هاي صاروا ياخذوا جاجاتهم عند الختيار بعد ما ربط الديك مشان يكبسوا
جاجاتهم بالفلوس..كل جاجة بيروح عندها الديك بتعريفة..!! –نصف قرش- فضحكت كثيرا
وقلت لصديقي "ثُعلبه" يا رجل ما خليت حد من شرك في الحكايات ...!! فقال
لي شو رايك احكيلك عن بلدكم ..قلت له اوعى تحكي...عن البلد تبعتي..!! اصلا ما في
عليها ولا مستمسك..والا انا بخرف وماسك كثير على بلدكم ..خليها مستوره!!.وضحكنا
واستاذن ..صديقي بعد ان شربنا ابريقا من الشاي كاملا واستمتعنا بحكايات زمان
ونوادر اهلها!!..ورأينا انها افضل ما نسمع عن صفقة القرن والسياسة والدولار طلع
والدولار نزل...!!.نشعر انه ايام زمان بالرغم من القلة ..الا انها كانت غنية بشعور
جميل بعيدا عن التكنولوجيا والموبايلات .كان الوفاء والاخلاص والاحترام
حقيقي...ليس هناك اي زيف في العلاقات !!!اكثر ما اضحكني هو حبس الديك وربطه بحبل
كي لا يكبس جاجات الجيران من اجل الاحتكار.!!.والله ادم سميث ابو الاقتصاد
العالمي..... ما عملها...اخترتها عنوانا للحوار...
·
ولكم مني كل التحية
·
التاريخ: 12-1-2019
تعليقات
إرسال تعليق